Përhapi informacione të rreme për punonjësit e bashkisë Gjirokastër, procedohet 33-vjeçari

Policia ka proceduar penalisht një 33-vjeçar në Gjirokastër, Procedimi i tij ka ardhur pasi dyshohet se ka përhapur informacione të rreme në rrjetet sociale me pretendimin se kryetari i bashkisë dhe punonjës të bashkisë Gjirokastër janë të infektuar me HIV/AIDS.

I proceduari është idenifikuar si Emin Kokalari. Ai akuzohet për veprën penale “Përhapja e informatave të rreme që ngjallin panik”. Në cilësinë e provës materiale u sekuestrua celulari i 33-vjeçarit.

“Gjirokastër/ Procedohet penalisht një 33-vjeçar, pasi dyshohet se ka përhapur informacione të rreme në rrjetet sociale, duke shkaktuar panik te qytetarët, me pretendimin se kryetari i bashkisë dhe punonjës të bashkisë janë të infektuar me HIV/AIDS.

Specialistët për Hetimin e Krimeve në Komisariatin e Policisë Gjirokastër referuan materialet në Prokurori, ku nisi procedimi penal për shtetasin E. K., 33 vjeç, banues në Gjirokastër, për veprën penale “Përhapja e informatave të rreme që ngjallin panik”. Në cilësinë e provës materiale u sekuestrua celulari i 33-vjeçarit.

Materialet procedurale iu kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme”, njofton policia.