‘Përjashtimi i Berishës thikë pas shpine’, Flamur Noka debate me Bashën në mbledhjen e kryesisë

Mbledhja e sotme e kryesisë së grupit parlamentar të Partisë Demokratike është shoqëruar me debate mes deputetit të zgjedhur të PD, Flamur Noka dhe kryedemokratit Lulzim Basha lidhur me përjashtimin e Sali Berishës nga grupi.

Noka mësohet të jetë shprehur se përjashtimi i Berishës ishte thikë pas shpine dhe se vendimin lidhur me këtë çështje duhet ta merrnin forumet e PD.

“Me këtë vendim e ke futur PD në një rrokullimë pa kthim. Çdo vendim në kundërshtim me vullnetin e shumicës së anëtarësisë e përçan PD. Ti je përgjegjës që i ke ngulur një thikë pas shpine Sali Berishës. Ti pavarësisht kësaj, ke thënë se është vendimi i jetës time”, mësohet të jetë shprehur Noka.

Kryedemokrati Basha mësohet të ketë përsëritur se vendimi për përjashtimin e Berishës nuk do të ketë kthim pas ndërsa ka theksuar se nuk do të lejojë grupe kundër amerikane në PD.

“Nuk ka për të pasur asnjë mbledhje të Kuvendit Kombëtar, e asnjë mbledhje të ndonjë forumi tjetër anti-amerikan”, mësohet të ketë thënë kreu i PD.

Sipas tij, kërkesa për Berishën nuk ka ardhur nga zyrtarë të nivelit të tretë apo të rangut të ulët, por nga kupola e shtetit amerikan.

“Informacionet i di unë siç i di shumë mirë edhe doktori dhe që ju s’keni për t’i marrë vesh kurrë”, mësohet të jetë shprehur kreu i PD.

Mësohet se gjatë ditës se sotme kryedemokrati Basha po zhvillon takime me krerët e degëve lokale të PD në qarkun e Fierit.

Këto takime të Bashës me krerët e degëve të Fierit vijnë një ditë para takimit që ka paralajmëruar Berisha në këtë qytet.

Gjatë mesditës, kreu i PD ka pasur një takim edhe me deputetët e Lezhës. Takimi me ta vjen pas dorëheqjes se Mark Markut që ka lënë vakant edhe pozicionin e drejtuesit politik të PD në qarkun e Lezhës, në vend të të cilit Basha caktoi Agron Gjekmarkajn.

LEXONI GJITHASHTU:

• Berisha kërkon largimin e Bashës nga drejtimi i PD: Ka 8 vjet që humb
• Baton Haxhiu: Berisha synon rikthimin si Nano, por do shkatërrojë vetveten