Përjashtohet nga Policia e Shtetit oficerja e arrestuar në Rinas

Efektivja e policisë së Rinasit e arrestuar nga AMP është përjashtuar nga policia e shtetit. Efektivja S.K, 29 vjeçe akuzohet për “Shpërdorim Detyre”,  “Korrupsioni pasiv i personave që ushtrojnë funksione publike” dhe “Ndërhyrja në të dhënat kompjuterike”.

29-vjeçarja është ndaluar pasi ka pasur një informacion për një parregullsi në procedurën e mbylljes së praktikës për heqjen nga statusi ‘Alert’ të mjetit në pronësi të shtetasit L. K.

Përmes një njoftimi për mediat, Policia e Shtetit njoftoi se efektivja është përjashtuar menjëherë nga radhët e policisë.

“Drejtori i Përgjithshëm i Policisë së Shtetit ka miratuar propozimin e Drejtorisë së Standardeve Profesionale në Policinë e Shtetit, për përjashtimin e menjëhershëm nga Policia e Shtetit, të punonjëses së Policisë së Shtetit, inspektore S. K., 29 vjeçe, me detyrë trup shërbimi në Seksionin e Sigurisë, në Komisariatin e Policisë Kufitare Rinas. Përjashtimi i kësaj punonjëseje u bë për shkelje të Rregullores së Policisë së Shtetit, neni 208, pika 3 “Përdor pozitën si punonjës policie për përfitime personale”, pasi datë 25.09.2023, gjatë inspektimit të bërë nga grupi i inspektimit i Drejtorisë së Policisë Rrugore në OASH-në, në Sektorin e Policisë Rrugore në DVP Lezhë, u konstatua se një automjet i shpallur “Alert”, ishte hequr nga sistemi në mënyrë të kundërligjshme. Po nga verifikimet e kryera nga grupi i inspektimit i Drejtorisë së Policisë Rrugore dyshohet se automjeti është hequr nga “Alert, nga punonjësja e Policisë S. K”, bëri me dije policia.

LEXONI GJITHASHTU:

• Arrestohet avokati në Kukës, i zbulohet krimi i dy viteve më parë
• Arrestohet oficerja e policisë në Rinas, ndërhyri në të dhënat kompjuterike