Përleshje të dhunshme në Sidnej, Australia bën thirrje për qetësi: Të ndalen vrasjet

Pas përleshjeve të shumta në Sidnej midis policisë dhe demonstruesve që kundërshtojnë vizitën e Presidentit Izraelit Isaac Herzog në Australi, udhëheqësit australianë tashmë bëjnë thirrje për qetësi. Ata kërkojnë që protestat të mbeten paqësore.

Policia tha se 27 persona u arrestuan teksa ndërhynë për të shpërndarë mijëra protestues që ishin mbledhur pranë bashkisë së Sidneit.

Protestuesit, përfshirë një ligjvënës të opozitës, thanë të martën se ishin sulmuar nga oficerët.

Kryeministri Anthony Albanese tha se ishte “i shkatërruar” nga dhuna dhe u bëri thirrje protestuesve të shprehin pikëpamjet e tyre në mënyrë paqësore.

“Australianët duan dy gjëra. Ata nuk duan që konflikti të sillet këtu. Ata duan që vrasjet të ndalen, qofshin ato izraelitë apo palestinezë, por ata nuk duan që konflikti të sillet këtu”, tha Albanese.

“Shkaqet nuk avancohen nga këto lloj skenash – ato minohen.”

Policia shtetërore e Uellsit të Ri Jugor theksoi se nuk pati raportime për lëndime serioze në njerëz.