Përmbytje e zjarre, katastrofë nga reshjet në Slloveni e Austri, ‘digjet’ Portugalia

Përmbytjet masive në Slloveni janë konsideruar si katastrofa më e rëndë në historinë moderne të vendit. Të paktën 4 persona humbën jetën, ndërsa dëmet materiale llogariten deri në 500 milionë euro. Sipas qeverisë, dy të tretat e vendit janë prekur nga përmbytjet dhe rrëshqitjet e tokës.

“Dëmi është i paimagjinueshëm. Praktikisht, dy të tretat e Sllovenisë janë të prekura nga përmbytjet dhe përpjekjet për t’u rikthyer në normalitet do të jenë të mëdha”, tha Robert Golob, kryeministër i Sllovenisë.

Në Austrinë fqinje është raportuar viktima e parë e përmbytjeve. Në Karinthia, dy persona ranë në një lumë dhe vetëm njëri arriti të shpëtohej. Gjysma e lokalitetit jugor u prek ndjeshëm nga përmbytjet e fundjavës.

Shërbimeve të emergjencës iu desh t’u përgjigjeshin telefonatave të shumta, përmes të cilave kërkohej ndihmë për evakuim.

Në të njëjtën kohë, në Pirenej vazhdon lufta me zjarret pyjore. Në pjesën perëndimore dhe atë qendrore të Portugalisë, fshatra të shumtë u evakuuan. Në tërësi, 6 persona mbetën të lënduar dhe 6.200 hektarë të shkrumbuar.

Në kufirin franko-spanjoll, në afërsi të lokalitetit Portbu, 130 persona u evakuuan për shkak të zjarreve që po afroheshin. Flakët dogjën rreth 200 hektarë tokë në tre orë dhe u përhapën me shpejtësi, të ndihmuara nga erërat. Në komunikimet e fundit, autoritetet deklaruan se situata ishte nën kontroll.

LEXONI GJITHASHTU:

• VIDEO| Sllovenia përjeton fatkeqësinë më të madhe natyrore
• Stuhia kërcënon sërish Slloveninë: Mbrojtja civile dhe ushtria në gatishmëri