Përveç ekonomive familjare, vërshimet e fundit në Kosovë, sikurse këto në Drenas, kanë shkaktuar dëme edhe tek bizneset e vogla.

“Po të gjitha i kemi të dëmtuara, me rroba, çanta, orë e të gjitha. Është lokal i vogël por ka vlerë sepse kemi futur gjëra mjaft shumë. Kam mall deri në 10 mijë euro. S’kemi çfarë të bëjmë, s’ke as ku ankohesh as asgjë”, u shpreh Xhemajl Elshani, pronar biznesi në Drenas.

“Po nuk e di mua më është prishur më shumë teknika e CD-të sepse ato janë më lart, por më është prishur teknika sepse ka qenë në tokë. Nuk e di, nga komuna s’ka ardhur askush as kurrfarë zgjidhje s’kemi. Tani siç po e shikoni edhe ju, s’ka ardhur askush të na shohë, ujë në të gjitha anët”, tha Bashkim Demaku, pronar biznesi në Drenas.

Nga ana tjetër, komuna e Drenasit ka pak mundësi të bëjnë diçka për bizneset.

Në fakt, komunat i regjistrojnë dhe llogarisin dëmet, të cilat i dërgojnë në qeveri.

 “Dy vitet e fundit është mirë që ministritë kanë ndarë fonde emergjente. Më shumë është kompetencë e nivelit qendror për të ndihmuar këto familje, por shpresojmë në ndihmë edhe kësaj radhe. Pasi që komunat me planifikim të buxhetit, nuk kanë plan të mjaftueshëm emergjent, vetëm rastet ad-hoc siç është rasti i evakuimit të familjeve nëpër hotele që janë strehuar. Ato shpenzime i kryen komuna por jo edhe dëmet që vijnë si pasojë e fatkeqësive natyrore”, tha Bekim Dobra, zëdhënës i komunës së Drenasit.

Në raste të tilla, e gjithë ajo çfarë komunat mund të bëjnë është strehimi për disa ditë i familjeve në hotelet e qytetit.

 “Jo, është nxehtë e me të gjitha të mirat. Na kanë shpëtuar që na kanë sjellë këtu. S’kemi pasur ku të shkojmë. Këtë na e kanë sjellë, nxehtë e kemi, të gjitha i kemi”, tha qytetari Imer Krasniqi.

Kryeministri Avdullah Hoti, gjatë vizitës në disa vende të goditura, deklaroi se qeveria do t’u dalë në ndihmë të gjithë qytetarëve të prekur nga këto vërshime.

Lexoni gjithashtu:

Përmbytje edhe në Kosovë, shpallet gjendja e emergjencës, dhjetëra familje në hotele