Përplasi çiftin me foshnjën, kapet shoferi i makinës luksoze

Policia ka bërë të mundur kapjen e shoferit i cili shkaktoi një aksident rrugor në “Rrugën e Kavajës” këtë të dielë, ku ka përplasur një çift dhe foshnjën e tyre 3-muajshe. Ajas Sulejmani u kap nga forcat e policisë në një spital privat.

Aksidenti ka ndodhur para një semafori, ku mbi vijat e bardha po ecnin kalimtarë. Mes tyre, po kalonte një çift me foshnjën 3-muajshe me karrocë.

Ndërsa automjetet e tjera kishin ndaluar pasi semafori ishte i kuq për automjetet, makina ‘Mercedes Benz G-Class” ka ardhur me shpejtësi duke marrë përpara çiftin.

Shoferi i makinës i përfshirë në aksident u  largua menjëherë nga vendi i ngjarjes duke mos u dhënë ndihmën e parë të plagosurve.

Drejtuesi i makinës, Sulejmani rezulton se i ishte hequr patenta vetëm pak javë më parë.

Ndërkohë, është arrestuar pasagjeri pasi është konfliktuar me oficerët e policisë.

Çifti dhe foshnja e tyre mësohet se ndodhen në spital, ku mësohet se një nga të plagosurit ndodhet në gjendje kritike për jetën.