Përplasi për vdekje 78-vjeçarin një ditë më parë në Shkodër, arrestohet drejtuesi i kamionit

Pas aksidentit të rëndë me pasojë vdekje të ndodhur ditën e djeshme në lagjen “Liria” në Shkodër, këtë të shtunë policia ka vënë në pranga autorin e përplasjes.

Sipas raportimeve nga policia, në pranga ka rënë Anxhelo Plaka, i cili me mjetin që drejtonte, tip kamion, ka përplasur për vdekje një të moshuar, Haki Bajrami, 78 vjeç, i cili në kohën e aksidentit po lëvizte në anë të rrugës dhe nga përplasja ka ndërruar jetë.

“Në vijim të informacionit paraprak të dhënë dje, për aksidentin në lagjen “Liria”, bëjmë me dije se specialistët e Qarkullimit Rrugor arrestuan në flagrancë shtetasin A. P., 30 vjeç, banues në Shkodër, për veprën penale “Shkelja e rregullave të qarkullimit rrugor”, me pasojë vdekjen”, thuhet në njoftimin e policisë.