Përplasi për vdekje këmbësorin te kryqëzimi i Rrilës, arrestohet në flagrancë 46-vjeçari

Policia e Lezhës, këtë të martë, ka vënë në pranga një 46-vjeçar, i cili dyshohet se ka përplasur për vdekje, në orët e para të mëngjesit të sotëm, një këmbësor. Mësohet se 46-vjeçari, pasi shkaktoi aksidentin, u largua nga vendi i ngjarjes.

Sipas njoftimit të policisë, aksidenti ka ndodhur në kryqëzimin e Rrilës rreth orës 03:30, ndërsa identiteti i viktimës ende nuk është bërë i ditur.

“Informacion paraprak/Shërbimet e Policisë Rrugore, si rezultat i veprimeve të shpejta hetimore dhe policore, identifikuan dhe kapën shtetasin I. M., 46 vjeç, i cili u largua nga vendi i aksidentit (kryqëzimi i Rrilës), ku rreth orës 03:30, përplasi me automjetin që drejtonte, një këmbësor ende të paidentifikuar, i cili si pasojë humbi jetën. Vijojnë verifikimet për të identifikuar shtetasin që humbi jetën, si dhe për të sqaruar rrethanat e aksidentit.

Materialet procedurale iu referuan Prokurorisë së Lezhës, për veprime të mëtejshme”, thuhet në njoftimin e policisë.