Përplasje mes tifozëve në “Elbasan Arena” pas humbjes ndaj Vorës

Momente tensioni janë shënuar në shkallët e stadiumit “Elbasan Arena”, pas ndeshjes që përfundoi me fitoren 2-1 të Vorës ndaj Elbasanit, në kuadër të javës së 7-të të Kategorisë Superiore.

Pas përfundimit të sfidës, një pjesë e tifozerisë verdheblu ka kapërcyer drejt tribunës së miqve, ku ka ndodhur përleshja mes dy grupeve. Të pranishmit raportojnë për hedhje sendesh të forta dhe fyerje në kor.

Ndërhyrja e menjëhershme e forcave të rendit ka bërë të mundur qetësimin e situatës, duke shmangur përshkallëzimin e dhunës. Me këtë humbje, Elbasani humbi mundësinë për t’u afruar me zonën e kreut në renditjen e kampionatit.