Përplasje në Himarë, qyetetarët ndërpresin mbledhjen e Këshillit Bashkiak

Ka nisur me tensione mbledhje e këshillit Bashkiak të Himarës, ku pritet të caktohet drejtuesi i ri i bashkisë së këtij qyteti.

Të pranishëm në ambientet ku po mbahet mbledhja janë dhe mbështetës të shumtë të Fredi Belerit, të cilët janë përplasur me policinë.

Qytetarët kundërshtojnë që detyra e kryebashkiakut t’i kalohet një prej nënkryetarëve nga radhët e Partisë Socialiste.

Nën thirrjet “jashtë” dhe duke brohoritur Beleri, qytetarët ndërprenë punime e mbledhjes së Këshillit Bashkiak dhe kërkuan daljen nga salla të prefektit të Vlorës, Vangjel Tavo.

Tensionet bënë që mbledhja të shtyhet për më vonë në në një moment kur situata të jetë më e qetë.

Në këtë seancë ishte parashikuar votimi se cili prej dy nënkryetarëve, Blerina Bala apo Pervin Gjikuria do të drejtojë bashkinë Himarë deri në zgjedhjet e reja.

Socialistët kanë shumicën në këshillin bashkiak të Himarës, 13 vota kundrejt 8 të opozitës.

Vakanca e krijuar në drejtimin e Bashkisë së Himarë erdhi pasi kryebashkiaku në detyrë Jorgo Goro u arrestua më 23 mars. Ai po hetohet nga SPAK me dyshime se ka shpërdoruar detyrën në dy raste, duke tjetërsuar dy prona në Dhërmi, ku përfitues fundor i truallit ka qenë biznesmeni Artan Gaçi, ish-deputet i PS.

Ndërkohë që kryetari i zgjedhur i bashkisë Himarë, Fredi Beleri, nuk mundi të kryente betimin për shkak të mosdhënies së një leje të posaçme nga GJKKO.

Kujtojmë gjithahstu se GJKKO vendosi të martën e 5 marsit që të shpallte fajtor për korrupsion aktiv në zgjedhje Fredi Belerin duke e dënuar atë me 2 vjet burg.

LEXONI GJITHASHTU:

• Kush do ta drejtojë Himarën? Tavo: Këshilli bashkiak do të vendosë 
• Jorgo Goro jep dorëheqjen, e paraqet atë në Këshillin Bashkiak të Himarës