Përshkruan kryqëzimin e Jezusit, piktura e humbur e Rubensit shitet 2.3 milionë €

Një pikturë e humbur prej kohësh nga Peter Paul Rubens është shitur në ankand për 2.3 milionë euro në Versajë. Piktura, e cila përshkruan kryqëzimin e Jezusit nga mjeshtri flamand i barokut (1577–1640), kishte qenë e fshehur për më shumë se katër shekuj dhe u zbulua së fundmi në një shtëpi private në Paris.

“Menjëherë pata një parandjenjë për këtë pikturë dhe bëra gjithçka që mundja për ta vërtetuar atë,” tha ankandisti Jean-Pierre Osenat për AP. “Dhe më në fund, arritëm ta konfirmonim atë përmes Rubenianum, komiteti i Rubens në Antwerp.”

Nils Büttner, një ekspert i njohur për studimet mbi Rubensin, shpjegoi se artisti shpesh pikturonte kryqëzime, por rrallë e përshkruante “Krishtin e kryqëzuar si një trup të vdekur në kryq”. “Pra, kjo është e vetmja pikturë që tregon gjak dhe ujë që del nga plaga anësore e Krishtit, dhe kjo është diçka që Rubens e pikturoi vetëm një herë,” tha ai.

Shtëpia e ankandeve Osenat njoftoi se autenticiteti i pikturës u konfirmua pas analizave shkencore. Eksaminimi mikroskopik i shtresave të bojës zbuloi jo vetëm pigmente të bardha, të zeza dhe të kuqe në zonat që përfaqësonin mishin, por edhe pigmente blu dhe jeshile që Rubens përdorte zakonisht në pikturimin e lëkurës së njeriut.