Persona të armatosur vranë shtatë persona në një pishinë publike në Meksikë

Të paktën shtatë persona, përfshirë një fëmijë, u vranë kur persona të armatosur hapën zjarr në një pishinë publike në qytetin e Cortazar, në shtetin qendror meksikan të Guanajuato, thanë autoritetet lokale.

Kur forcat lokale të sigurisë mbërritën në vendngjarje, ata gjetën kufomat e shtatë personave, duke përfshirë një fëmijë nën moshën shtatë vjeç, dhe shumë gëzhoja, raporton CNN.

Një tjetër person ka mbetur i plagosur rëndë nga sulmi dhe është dërguar në spital.

Ushtria dhe policia meksikane janë në kërkim të sulmuesve, ndërsa motivi i sulmit nuk dihet ende.

Një nga dëshmitarët okularë tha se sulmuesit e armatosur hapën zjarr në pishinë të shtunën pasdite, dhe më pas dëmtuan kamerat e sigurisë dhe monitorin para se të largoheshin, raporton CNN.

Videot e postuara në rrjetet sociale tregojnë njerëz me rroba banje duke bërtitur dhe duke përqafuar fëmijët e tyre.

Guanajuato është rajoni kryesor bujqësor në Meksikë dhe fabrikat e shumë prej prodhuesve kryesorë të makinave në botë ndodhen aty.

LEXONI GJITHASHTU:

• 37 viktima nga zjarri në zyrën e emigracionit të Meksikës
• Arrestohet djali i El Chapo, kaos dhe dhunë në Meksikë