Përvetësoi fondet e FIFA-s, Kongo kërkon urdhër arresti ndërkombëtar për presidentin e Fecofoot

Autoritetet në Kongos i kanë kërkuar Interpolit një urdhër arresti ndërkombëtar kundër Jean-Guy Blaise Mayolas, presidentit të federatës së futbollit të vendit, Fecofoot. Kjo kërkesë vjen pasi Mayolas u dënua për përvetësim të 1.1 milion dollarëve nga fondet e FIFA-s.

Mayolas është në arrati me gruan dhe djalin e tij, pasi të gjithë u dënuan me burgim të përjetshëm këtë muaj për përvetësim të fondeve të ofruara nga organi qeverisës i futbollit botëror, si pjesë e planit të tij të ndihmës për Covid-19, në shkurt 2021. Kjo shumë përfshinte pothuajse 500,000 dollarë të destinuar për ekipin e grave të Kongos.

Mayolas dhe familja e tij u gjykuan në mungesë dhe besohet se janë larguar nga vendi disa javë para seancës dëgjimore. Autoritetet dhe forcat policore partnere në rajon janë njoftuar dhe zyrtarët po punojnë me njësitë e inteligjencës financiare, përfshirë Tracfin, njësinë franceze të inteligjencës financiare, për të ngrirë asetet e lidhura me rastin.

Mayolas dhe anëtarët e familjes së tij u dënuan për pastrim parash, falsifikim, përdorim dokumentesh të falsifikuara dhe përvetësim më 10 mars nga gjykata në Brazzaville, së bashku me sekretarin e përgjithshëm të Fecofoot, Badji Mombo Wantete, dhe arkëtarin, Raoul Kanda.

Wantete dhe Kanda u dënuan me nga pesë vjet burg secili. FIFA hapi procedura disiplinore kundër Mayolas, Wantete dhe Kanda javën e kaluar për shkelje të dyshuara financiare.

Akuzat që po shqyrtohen përfshijnë konflikt interesi, falsifikim dhe pranim të pahijshëm të dhuratave, pasi komiteti i etikës i FIFA-s mori informacione dhe dokumente gjatë një shqyrtimi.

Mayolas i mohoi të gjitha akuzat para zhdukjes së tij, duke i përshkruar ato si një komplot. Wantete gjithashtu i hodhi poshtë akuzat.