Është një përvjetor pa evente madhështore në Mbretërinë e Bashkuar ai që shënon tre vitet nga hyrja në fuqi të akordit të shkëputjes, ose atij të divorcit mes Londrës dhe Bashkimit Evropian.

Akordi konkretizoi fundin e shtegut të ndarjes që ishte pasojë e fitores së atyre që mbështesnin largimin kundrejt atyre që kërkonin qëndrimin në referendumin e qershorit 2016.

Por pasojat e divorcit duket se janë bërë të diskutueshme në mbarë Britaninë e Madhe dhe në gjithë vendin ka një zhgënjim për mungesën e mbajtjes së premtimeve të bëra dhe të rezultateve që do të sillte ky largim.

Të paktën kështu tregojnë sondazhet e fundit. Njëri prej tyre, i realizuar në vigjilje të përvjetorit, dëshmon se si ndjesia e quajtur “Bregret”, një kombinim i fjalëve Breksit dhe regret, që do të thotë “pendesë”, ka prekur pjesën dërrmuese të qytetarëve, përfshirë ata që me shumë zell mbështesnin largimin nga BE-ja dhe që ishin ndër më euro-skeptikët.

Por kjo nuk përkthehet, të paktën për momentin, në një dëshirë për t’u rikthyer në radhët e Unionit; objektiv që në bazë të një ankete të publikuar në fundjavë nga “The Independent”, përkrahet nga jo më shumë se 43 për qind e të intervistuarve.

Bëhet fjalë për një kuotë poshtë mazhorancës absolute, ku bëjnë pjesë 41 për qind kundër dhe 16 për qind persona të pavendosur.

Tendenca e refuzimit reflektohet jo vetëm tek Partia Konservatore në pushtet, por edhe tek lideri i opozitës, laburisti Kei Starmer.

Të dy zyrtarët refuzojnë të hapin në këto momente çfarëdo debati mbi rikthimin e mundshëm në krahët e Brukselit, apo edhe vetëm në tregun e përbashkët, apo në unionin doganor.

LEXONI GJITHASHTU:

• Britania ka mijëra mjekë më pak për shkak të Brexitit
• Von der Leyen: Britania e Madhe të vazhdojë të respektojë marrëveshjen e Brexit