Peter Stano: Disa prej masave ndaj Kosovës kanë hyrë në fuqi, mund të ketë të tjera

Zëdhënësi i Bashkimit Evropian, Peter Stano, ka deklaruar gjatë një konference për media se blloku nuk e përjashton mundësinë që Kosova të përballet edhe me masa të tjera, nëse Qeveria në prishtinë nuk përmbush kërkesat ndërkombëtare.

Stano tha se një sërë masash kanë hyrë në fuqi, ndërkohë që nënvizoi se një sërë masash të tjera mund të aplikohen.

“Ka një sërë masash, apo propozime për një sërë masash. Disa prej tyre tashmë kanë hyrë në fuqi menjëherë. Disa prej tyre janë ende duke u diskutuar dhe vendet anëtare do t’i zbatojnë gradualisht, nëse nuk do të ketë ndryshim të qasjes së autoriteteve të Kosovës. Spektri është relativisht i gjerë”, ka thënë Stano në një konferencë për media.

Sipas tij, masat e marra ndaj Kosovës nuk janë sanksione apo masa kufizuese në aspektin klasik.

Stano ka thënë se masat janë të përkohshme, dhe janë përgjigje ndaj “dështimit” të kryeministrit të Kosovës, Albin Kurti, për të marrë hapa konkretë dhe të menjëhershëm për uljen e tensioneve në pjesën veriore të Kosovës.