Pezullimi i Ballukut nga GJKKO, Kushtetuesja shqyrton sot kërkesën e qeverisë

Kolegji i Gjykatës Kushtetuese do të vendosë sot nëse do ta kalojë për shqyrtim ankimimin e qeverisë për pezullimin nga detyra si zëvendëskryeministre të Belinda Ballukut nga GJKKO.

Shqyrtimi i çështjes Balluku do të bëhet në mbledhjen e parë që Kushtetuesja ka planifikuar për ditën e sotme.

Treshja e gjyqtarëve të Kolegjit, Marsida Xhaferllari, Sandër Beci dhe Sonila Bejtja do të vendosin nëse do të kalojnë për shqyrtim kërkesën e qeverisë.

Kolegji duhet të bëjë vendimmarrje nëse do pranojë kërkesën e qeverisë për këtë çështje; kërkesa mund të rrëzohet nga të tre gjyqtarët dhe nëse vetëm njëri prej ka votën kundër çështja kalon në gjykim nga tetëshja e gjyqtarëve të Kushtetueses.

Më 21 nëntor Qeveria dërgoi në Gjykatën Kushtetuese kërkesën e saj për pezullimin nga detyra të zv.kryeministres Belinda Ballukun.

Kryeministri Edi Rama e cilësoi cenim të ekzekutivit vendimin e Gjykatës së Posaçme për të pezulluar nga detyra ministren e Energjisë dhe Infrastrukturës dhe zv.kryeministren Belinda Balluku.

Vendimi i qeverisë erdhi pasi Gjykata e Posaçme caktoi dy masa sigurie për zëvendëskryeministren Belinda Balluku: “pezullim i ushtrimit të detyrës dhe funksionit” dhe “ndalim i daljes jashtë vendit” në kuadër të hetimeve për shkelje të barazisë në tenderë.

LEXONI GJITHASHTU:

• Rama për pezullimin e Ballukut: Venecia dhe Strasburgu janë kundër pezullimit
• Shtyhet për javën e ardhshme shqyrtimi i çështjes së Belinda Ballukut në Kushtetuese