Pezullohet përpjekja për arrestimin e Presidentit të Koresë së Jugut, Yoon Suk Yeol

Autoritetet e Koresë së Jugut kanë pezulluar përkohësisht përpjekjet për të arrestuar Presidentin e shkarkuar Yoon Suk Yeol, pas një ballafaqimi të tensionuar që zgjati rreth gjashtë orë në rezidencën e tij në Seul.

Operacioni, që përfshinte rreth 100 hetues dhe 3,000 policë, u ndalua nga një barrikadë e përbërë nga 200 ushtarë dhe personel sigurie besnik ndaj zotit Yoon. Ndonëse nuk pati përdorim armësh, autoritetet përmendën rrezikun e madh në hapësirën e mbyllur si arsye për pezullimin e veprimit.

Presidenti Yoon, i cili është shkarkuar nga parlamenti dhe ka kompetencat e pezulluara, akuzohet për rebelim dhe abuzim të detyrës lidhur me shpalljen e një gjendjeje të jashtëzakonshme më 3 dhjetor, e cila u shfuqizua më vonë nga ligjvënësit. Vendimi përfundimtar për shkarkimin e tij është në duart e Gjykatës Kushtetuese.

Fletë-arresti ndaj tij skadon të hënën, dhe autoritetet kanë njoftuar se po shqyrtojnë hapat e ardhshëm në hetimet ndaj ish-presidentit konservator.

LEXONI GJITHASHTU:

• Gjykata Kushtetuese e Koresë së Jugut nis procedurat për shkarkimin e Yoon Suk Yeol
• Lëshohet urdhër-arrest për Presidentin e Koresë së Jugut