Pistorius kritikon Von der Leyen për planet për të dërguar trupa në Ukrainë

Ministri gjerman i Mbrojtjes, Boris Pistorius, kritikoi sot presidenten e Komisionit Evropian, Ursula von der Leyen, për deklaratën publike të planeve për të dërguar trupa shumëkombëshe në Ukrainë, të cilat do të ishin pjesë e garancive afatgjata të sigurisë, pas arritjes së një armëpushimi në luftën me Rusinë.

Pistorius u tha gazetarëve në uzinën e industrisë së mbrojtjes në qytetin Troisdorf të Gjermanisë Perëndimore se është “thelbësisht e gabuar” të merren në konsideratë opsione të tilla para bisedimeve të paqes, raporton Politiko sot.

“Bashkimi Evropian nuk ka asnjë përgjegjësi ose kompetencë kur bëhet fjalë për vendosjen e trupave, për askënd dhe për asgjë. Do të përmbahesha nga konfirmimi ose komentimi i konsideratave të tilla në asnjë mënyrë”, theksoi ministri gjerman.

Ai pranoi se qeveritë po shqyrtojnë se çfarë do të ishte e mundur, por theksoi se e konsideron “krejtësisht të gabuar” ta diskutojnë publikisht në këtë kohë.

Pistorius po komentonte mbi një intervistë të Ursula von der Leyen, të botuar nga Financial Times gjatë fundjavës, në të cilën ajo tha se Evropa po bënte “plane mjaft të sakta” për vendosjen shumëkombëshe të forcave në Ukrainë, si pjesë e garancive të sigurisë pas luftës.

Von der Leyen tha se planet mund të përfshijnë dhjetëra mijëra trupa nga vendet evropiane, me mbështetje nga Shtetet e Bashkuara në fusha të tilla si inteligjenca dhe komanda.

LEXONI GJITHASHTU:

• Bullgaria dhe Gjermania ndërtojnë fabrika baruti e municionesh prej 1 miliard eurosh
• Merz: Gjermania s’do ta njohë shtetin palestinez në Asamblenë e Përgjithshme të OKB