Pjesë e goditjes ndaj krimit, cili është qyteti ku Trump do dërgojë Gardën Kombëtare

Presidenti Donald Trump ka njoftuar se Memfisi i Tenesit do të jetë qyteti i radhës në SHBA ku do të dislokohen trupat e Gardës Kombëtare, si pjesë e fushatës së tij të ashpër kundër krimit në qytetet e udhëhequra nga demokratët.

Në një intervistë të premten në Fox News Channel, Trump deklaroi se kryetari demokrat i bashkisë së Memfisit është “i lumtur” për vendimin, po ashtu edhe guvernatori republikan i Tenesit. Megjithatë, presidenti nuk dha detaje për datën konkrete të dislokimit, duke u shprehur shkurt: “Do të shkojmë në Memfis. Memfisi është thellësisht i shqetësuar.”

Vendimi vjen rreth një muaj pas dërgimit të trupave në Uashington DC, dhe konsiderohet si një përshkallëzim i politikave të tij të brendshme të sigurisë, sidomos në qytetet me nivele të larta kriminaliteti.

Sipas të dhënave të FBI-së, Memfisi ka një nga normat më të larta të krimeve të dhunshme në SHBA, me 2,501 krime për 100,000 banorë, një statistikë që Trump e ka cituar shpesh në përpjekje për të justifikuar ndërhyrjen federale.

Presidenti përmendi gjithashtu se synon uljen e kriminalitetit në qytete si New Orleans dhe Çikago. Edhe pse për javë të tëra është spekuluar për një ndërhyrje në Çikago në kuadër të “Operacionit Midway Blitz” — një nismë federale për zbatimin e ligjit të imigracionit dhe luftën kundër krimit — Trump la të kuptohet se për momentin ka zgjedhur Memfisin si prioritet, duke shtuar: “Do të kisha preferuar të shkoja në Çikago.”

LEXONI GJITHASHTU:

• OKB miraton rezolutë për zgjidhjen me dy shtete të konfliktit izraelito-palestinez
• Më shumë se 100 ligjvënës francezë kërkojnë shkarkimin e Presidentit Macron