Pjesëmarrje minimale në qendrën e votimit të personave me aftësi ndryshe, s’ka fletë për të verbërit

Në qendrën e votimit të personave me aftësi ndryshe në qarkun e Kukësit ka pasur një pjesëmarrje shumë të ulët votimi, ku nga 62 që është numri i votuesve, deri më tani kanë votuar vetëm 16 persona.

Kryetari i komisionit të qendrës së votimit të personave me aftësi ndryshe tha se procesi i votimit po vijon normalisht, ndërsa presin që të ketë edhe pjesëmarrës të tjerë në votime.

“Presim që personat të vijnë edhe pse kanë ngelur pak orë”, u shpreh ai.

Në lidhje me ambientet e kësaj qendre votimi, z. Guri tha se janë të përshtatura për personat me aftësi ndryshe, përveç personave të verbër për të cilët nuk ka fletë votimi të posaçme. Në këtë rast, personat e verbër shoqërohen nga një person i familjes.

“Ambientet janë të përshtatura për personat me aftësi ndryshe. Aktualisht nuk kemi fletë votimi për personat e verbër dhe ata shoqërohen me një familjar të tyrin”, u shpreh z. Guri.