Plagosi me thikë 45-vjeçarin një ditë më parë, në pranga autori në Vlorë

Pas ngjarjes së ndodhur ditën e djeshme, ku si pasojë e një konflikti për motive të dobëta mes dy individëve mbeti i plagosur një person, këtë të dielë policia ka arrestuar autorin e ngjarjes.

Sipas raportimeve nga policia, është arrestuar shtetasi F. Z., 48 vjeç, banues në Vlorë, i cili, për motive të dobëta, ka goditur me mjet prerës, thikë, shtetasin I. S., 45 vjeç, ndërsa ky i fundit ndodhet jashtë rrezikut për jetën.

Njoftimi i policisë:

“Në vijim të informacionit paraprak të dhënë mbrëmjen e djeshme, për ngjarjen e ndodhur në lagjen “Pavarësia 3”, specialistët për Hetimin e Krimeve  Kundër Personit të Drejtorisë Policisë Vlorë arrestuan në flagrancë për veprën penale “Plagosja e rëndë me dashje”, shtetasin F. Z., 48 vjeç, banues në Vlorë.  Ky shtetas gjatë një konflikti të çastit për motive të dobëta, ka goditur me mjet prerës (thikë), shtetasin I. S., 45 vjeç, banues në Vlorë, i cili ndodhet në spitalin, jashtë rrezikut për jetën. Në cilësinë e provës materiale u sekuestrua mjeti prerës (thikë).    

Gjithashtu, po këta specialistë referuan materialet në Prokurori, për veprën penale “Plagosje e lehtë me dashje” për shtetasit I. S, 45 vjec, banues ne Vlorë( i dëmtuari), dhe shtetasin  A. A., 38 vjeç, banues në Vlorë, të cilët në fillimisht janë  konflikt fizikisht me shtetasin F.Z, duke e dëmtuar lehtë atë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme”, thuhet në njoftim.