Plan Marshall për BE-në kundër COVID-19, Ardian Hackaj: Çfarë përfiton Shqipëria

Presidentja e Komisionit Evropian, Ursula von der Leyen ka pranuar se në këtë fazë, Evropa ka nevojë për një Plan Marshall për të dalë nga kriza ekonomike e shkaktuar nga COVID-19.

Von der Leyen u ka bërë thirrje anëtarëve të BE-së të investojnë miliarda në buxhetin e bllokut për të shmangur pasojat katastrofike ekonomike.

Por a përfiton gjë Ballkani e më tej Shqipëria nga ky plan? Në një lidhje ‘live’ me Ilva Now, Ardian Hackaj, drejtor i Kërkimit në Institutin për Bashkëpunim dhe Zhvillim shpjegoi se ky plan është një përpjekje e të gjitha vendeve të BE për t’iu përgjigjur problematikës së coronavirus.

“Përmendja e planit marshall u mor në njëjtën mbledhje, më 25-26 mars kur u mor vendimi për negociatat me Shqipërinë dhe Maqedoninë e Veriut. Në qendër të kësaj qëndron çështja se si duhet të gjejë BE 1 trilion euro për të rindërtuar ekonominë dhe për t’u ringritur. Më 25 mars ka pasur 6 orë bisedime, por s’kanë rënë dakord pasi Italia, Spanja, Franca kërkojnë koperativizim të borxhit, ndërsa Gjermani dhe Holanda refuzojnë”, shpjegoi ai.

I pyetur se a përfiton Ballkani nga ky fond, z. Hackaj shpjegoi se apriori nuk mund të përfitojë. Por ai theksoi faktin se pozitive është që Parlamenti Evropian ka aprovuar alokimin e 410 mln eurove për mbështetje të 6 vendeve të Ballkanit për të dalë nga kriza e COVID-19, mes të cilëve edhe Shqipëria.

‘Ato janë nga fondi i solidaritetit evropian. Deri në shkurt të vitit 2020 vendet e Ballkanit nuk kishin qasje tek ky fond. Në këtë fond do të ketë qasje edhe Shqipëria dhe Maqedonia e Veriut. Në këtë pikë është e rëndësishme edhe mënyra si do bëhet qasja e qeverive ndaj këtyre fondeve”, tha ai.