Plator Nesturi: Politizimi i incidenteve nuk i intereson as vetë PD-së, pasi humbet vota

I ftuar në studion e Euronews Albania, analisti Plator Nesturi foli për incidentin e mbrëmjes së djeshme në Kavajë ku u plagos një person në ambientet e zyrës PD-së. Z. Nesturi tha se nuk është e moralshme që incidente të tilla të përdoren politikisht.

“Deri më tani kemi pasur përgjithësisht një fushatë të qetë. Incidenti i djeshëm në Kavajë nuk është e moralshme të përdoret politikisht, pavarësisht se në fushatë mund të përdoren të gjitha mjetet për të sulmuar kundërshtarin”, u shpreh z. Nesturi.

Analisti Nesturi tha se dhënia e deklaratave të menjëhershme dhe akuzat e drejtpërdrejta të PD-së ishin të nxituara.

“PD-ja u nxitua të ketë deklarata të kësaj natyre menjëherë pas ngjarjes, pa pasur ende një qartësi se si ka ndodhur, çfarë përfaqëson. U bë sikur ky ishte i nxitur drejtpërsëdrejti nga Rama”, u shpreh analisti.

Analisti ritheksoi se përdorimi i incidentit politikisht është i pamoralshëm, për shkak se personazhi që kreu plagosjen, sipas z. Nesturi ka njohje si me PD-në, si me PS-në.

“Në komunitetet si Kavaja, ky personazh ka njohje si me të majtën si me të djathtën. Në rastin konkret, kur e sjellim në nivel kombëtar për të diktuar teza si nxitje tensioni dhe humbje qetësie, kjo nuk është e moralshme”, tha z. Nesturi.

Plator Nesturi tha gjithashtu se klima e zgjedhjeve ka qenë e qetë dhe nuk është as në interesin e PS-së dhe as të PD-së që të krijojnë një klime me tensione, pasi në këtë mënyrë të dyja palët humbasin vota.

“Klima zgjedhore deri tani ka qenë e qetë. PS-së nuk i intereson të krijojë një klimë të ashpër zgjedhore. Edhe mënyra e qetë e fushatës elektorale të PD-së, i ngriti peshë. Mund të ketë persona të tjerë brenda opozitës që nuk u intereson kjo gjë dhe kërkojnë një klimë më përplasëse dhe shfrytëzimi i çdo lloj incidenti për të dhënë mesazhe të gabuara dhe për të rritur klimën e tensionit nuk i shërben askujt, as vetë PD-së pasi kjo mund të çojë në një efekt negativ ndaj vetë PD-së dhe të humbasin vota”, tha z. Nesturi.