Plotësohet KQZ, Celibashi: Koha në disavantazhin tonë, nevojitet bashkëpunim

Komisioni Qendror i Zgjedhjeve nis punën për përgatitjen e procesit elektoral të 25 prillit. Dy organet e reja të KQZ-së u konstituuan ditën e sotme, duke plotësuar të gjithë organikën drejtueses të saj.

Koha nuk është një aleat i trupës zgjedhore, por për kryekomisionerin Ilirjan Celibashi, bashkëpunimi i tri hallkave mund ta eliminojë këtë disavantazh.

“Institucioni i KQZ-së formësohet në mënyrë të plotë. Shpresoj që bashkëpunimi institucional ndërmjet këtyre tri strukturave të jetë në bashkëpunim të plotë me qëllim që koha e shkurtër e cila është në dispozicion në përgatitjen këtyre zgjedhjeve të tejkalohet me një vullnet akoma më të shtuar prej secilit prej nesh”, tha kreu i ri i KQZ.

Implementimi i teknologjisë vijon të mbetet një nga sfidat kryesore dhe fondet për prokurimin e pajisjeve duhet t’i japë qeveria.

“Qeveria shqiptare ka një përgjegjësi të spikatur në lidhje me këtë çështje. Ne jemi në kontakt dhe besoj se gjatë kësaj jave do të kemi zhvillime”, u shpreh z. Celibashi.

Për identifikimin biometrik, pranë KQZ-së u ngrit një grup pune për vijimin e procedurave të mëtejshme.