‘Po hetojmë me Microsoft dhe FBI’, Çuçi: Hakerat s’kanë publikuar sistemin MEMEX

Ministri i Brendshëm, Bledi Çuçi deklaroi se listat e publikuara këtë të hënë nga hakerat iranianë me gjeneralitetet dhe fotot e personave me shtetësi shqiptare, nuk janë pjesë e bazës së të dhënave të sistemit Memex.

Teksa po hynte në Kuvend për të marrë pjesë në seancën e sotme plenare, Çuçi shtoi se hetimet po vijojnë bashkë me Microsoft dhe FBI.

“Lista që është publikuar e them me garanci të plotë që nuk është databaza e sistemit Memex që ka policia kriminale. Ju e dini që na kanë sulmuar. Jemi në hetim, kemi një trupë shumë të mirë nga Microsoft që do rrinë këtu përgjatë.

Sistemet do rikuperohen të gjitha. Kemi rikuperuar shumë sisteme në kohë rekord. Ka pasur edhe spekulime. Lista që është publikuar sot nuk është pjesë e databazës së sistemit Memex. Po hetojmë bashkë me FBI”, theksoi Çuçi.

1.7 giga byte material sensitiv u publikua nga hakerat e ashtëquajtur “Homeland Justice” mëngjesin e së hënës në platformën e komunikimit Telegram.

Bëhet fjalë për 49 lista të gjata ku pasqyrohet identiteti i personave, numri ID, mosha, vendlindja dhe foto e tyre e sistemit TIMS.

Në këto publikime, nuk jepen detaje të tjera se për çfarë janë të dyshuar personat në fjalë por besohet se materialet i përkasin sistemit MEMEX që administrohet nga Policia e Shtetit.

LEXONI GJITHASHTU

• ‘Fotomontazh’, Rama: Hakerat iranianë nuk kanë publikuar sistemin MEMEX
• Hakerat goditën MEMEX? Spiropali: Postojnë emra pa lidhje, hidhen akuza absurde
• Hakerat marrin edhe MEMEX? Sulmi kibernetik prek serverin e të dhënave operative