‘Po të isha unë Alende, Rama s’do ishte dot Pinoçet’, Meta përgjigjet për ‘Dosjet’

Kryetari i Partisë së Lirisë, Ilir Meta thotë se ka ditur të ruajë dinjitetin dhe kushtetutshmërinë e institucionit të presidencës për sa kohë ishte në detyrë, me gjithë presionin edhe ndaj gjykatës kundër tij.

Në konferencën e përjavshme për mediat, Meta e komentoi ligjin e dosjeve të miratuar një ditë më parë në Kuvend duke përdorur shprehjen popullore: u mbors mali e polli një mi.

I pyetur lidhur me deklaratën e tij kohë më parë, ku pati thënë se do të sakrifikohej si Salvador Allende për të marrë Ramën me vete, Meta tha se i ka mbajtur të gjitha premtimet duke bërë detyrën sa ishte në korrektesë dhe duke qenë çdo ditë në terren pas 24 korrikut.

“Ilir Meta i ka mbajtur të gjitha premtimet e tij. Nëse unë do isha Alende, Rama s’do ishte dot Pinoçet. Unë e kam mbajtur premtimin dhe deri në 24 korrik aty ka qenë një kështjellë e paprekshme e Kushtetutës. Janë harxhuar qindra miliona euro për presion ndaj Metës, edhe në Gjykatë Kushtetuese, u falsifikua edhe firma e kryetarit të Kuvendit dhe Ilir Meta në 24 korrik e la detyrën, ju përshëndeti me shqiponjën dhe në 25 korrik filloi fluturimin, dhe ju e dini që shqiponjat fluturojnë lart”, tha Meta.

Presidenti i Kilit në vitet ’70-’73 Salvador Allende që u vetëvra si sakrificë ekstreme kundër instalimit në pushtet të një junte ushtarake.

LEXONI GJITHASHTU:

• Meta i përgjigjet Ramës për ligjin e dosjeve: Do të shmangë vëmendjen nga vjedhjet
• Ilir Meta solidarizohet me pedagogët: Unë para 20 vitesh i rrita pagat me 58%