Policia 5 milionë lekë gjobë kandidatit të pavarur për deputet Elton Debreshi

Policia e Bulqizës ka gjobitur me 5 milionë lekë për organizimin e një tubimi në shkelje të masave anti-COVID kandidatin e pavarur për deputet Elton Debreshi.

Lajmin e njoftoi vetë Debreshi, i cili është një minator i njohur për aktivizmin për të drejtat e punëtorëve. Përmes një postimi në Facebook ai e konsideroi atë si “gjobë politike”.

Kandidati i pavarur e shoqëroi postimin me faksimile të vendimit të policisë, i cili mbante datën 2 prill. Gjoba është vendosur për një miting të organizuar nga Debreshi në datën 26 mars në qytetin e Bulqizës.

Prej 17 nëntorit 2020, me rekomandim të Komitetit Teknik të Ekspertëve, qeveria ka ndaluar grumbullimet me më shumë se 10 persona si masë parandaluese të përhapjes së COVID-19.

Duke e konsideruar në shkelje të Kushtetutës, pasi ndalonte edhe aktivitetet politike, më 4 dhjetor 2020 Partia Republikane (PR) e dërgoi këtë çështje në Gjykatën Kushtetuese. Kjo më 9 mars vendosi ta pranojë vetëm pjesërisht padinë e PR-së dhe i kërkoi qeverisë të saktësonte afatet e masave.

Më 24 mars, një ditë para nisjes së fushatës elektorale, Komiteti Teknik i Ekspertëve rekomandoi që masat kufizuese të ndalimit të grumbullimeve të mbeteshin në fuqi, rekomandim që u dha sërish edhe javën e shkuar.

Për organizim tubimesh në shkelje të masave anti-COVID, janë gjobitur gjithashtu Edmond Spaho dhe Endrit Brahimllari. Gjobitja e tyre është bërë për aktivitete gjatë muajit shkurt.

LEXONI GJITHASHTU:

• Gjykata Kushtetuese i kërkon qeverisë të rishikojë kohëzgjatjen e masave kufizuese për COVID-19
• Ndalimi i tubimeve partiake, Fatmir Mediu e kundërshton vendimin dhe tregon planin e mazhorancës
• Elton Debreshi: Kandidimi e vetmja shpresë që të na dëgjohet zëri, synimi statusi i minatorit
• Profil | Elton Debreshi, minatori nga Bulqiza që kërkon të bëhet deputet