Policia e Tiranës arrestoi një pronar Call Centeri së bashku me 3 bashkëpunëtorë, pasi mashtruan një klient italian duke i marrë 108.000 euro.

Biznesi, përfshi punonjësit, nuk ishin të regjistruar në tatime.

31-vjeçari O.F. u prezantohej të huajve sikur ishte agjent burse që investonte në Kriptomonedha dhe Forex (Bursa). Mirëpo këto para nuk shkonin për investime.

Në bashkëpunim me të ishin edhe M. K., A. L dhe S. XH.

Italiani të cilit i janë marrë 108.000 euro, kishte bërë transaksione për një periudhë disa mujore, me idenë se po investonte në bursa për të shumëfishuar të ardhurat.

Por paratë në vend që të shkonin në bursë, përfundonin në pronësi të personave që punonin te ky Call Center.

Kallëzimi është bërë nga vetë italiani.

Të arrestuarit akuzohen nga policia për mashtrim, fshehje të ardhurash, mospagim taksash dhe punësim të paligjshëm. Prokuroria e Tiranës po kryen hetimet për këta persona.

Kjo nuk është hera e parë që në Shqipëri policia arreston persona për mashtrim përmes Call Centerave.

Në dhjetor të vitit 2021 u arrestuan 35 persona për mashtrim në Call Center, ndërsa u ndaluan 60 të tjerë.