Policia australiane vret 16-vjeçarin pas një sulmi të dyshuar terrorist

Policia australiane njoftoi sot se një adoleshent 16-vjeçar u vra në ndërhyrjen e oficerëve të rendit pasi sulmoi dhe goditi me thikë një burrë të shtunën vonë në mbrëmje në Perth, kryeqyteti i Australisë Perëndimore.

Dyshohet se 16-vjeçari, i armatosur me thikë kuzhine, është radikalizuar nëpërmjet internetit dhe sulmi tregon për terrorizëm, njoftojnë autoritetet lokale, raporton “Reuters”.

Kryeministri australian Anthony Albanese tha se ai ishte informuar për incidentin nga policia dhe agjencitë e inteligjencës dhe konfirmoi se nuk kishte asnjë kërcënim të vazhdueshëm.

“Ne jemi një komb që e duam paqen dhe nuk ka vend për ekstremizëm të dhunshëm në Australi”, deklaroi kryeministri në platformën “X”.

“Sulmi në periferi të Willeton kishte shenjat dalluese të terrorizmit, por ende nuk është shpallur akt terrorist. Në këtë fazë duket se sulmuesi ka vepruar i vetëm,” tha kryeministri i Australisë Perëndimore Roger Cook në një konferencë shtypi në Perth.

Viktima, e cila u godit me thikë në shpinë, u dërgua në spital dhe është në gjendje të qëndrueshme, thanë autoritetet.

Një deklaratë zyrtare tha se para sulmit të së shtunës, policia mori telefonata nga anëtarë të shqetësuar të komunitetit lokal mysliman.

Incidenti në Perth vjen pasi policia e Uellsit të Ri Jugor muajin e kaluar akuzoi disa të mitur për vepra të lidhura me terrorizmin në Sydney.

LEXONI GJITHASHTU:

• Protestuesit pro-palestinezë dhe ata pro-izraelit përplasen në Australi
• Dhuna ndaj grave| Australianët dalin masivisht në protesta, kërkojnë ligje të ashpra