Policia britanike: Sulmi me thikë ndaj pjesëtarëve të komunitetit hebre incident terrorist

Dy persona u sulmuan me armë të ftohtë pasditen e së mërkurës në Londër, në atë që autoritetet e klasifikuan një agresion kundër komunitetit hebre.

Sipas mediave lokale, autori i sulmit u arrestua pasi u neutralizua me një pistoletë elektrike nga agjentët e policisë, të cilët e panë teksa vraponte mes njerëzve i armatosur me thikë.

Episodi i rëndë ndodhi në “Golders Green”, një zonë e Londrës ku banon komuniteti hebre. Dy të plagosurit u mjekuan në një qendër spitalore që ndodhet atje.

Sulmi është shpallur incident terrorist nga policia. Një hetim është duke u zhvilluar për të përcaktuar nëse komuniteti hebre po shënjestrohej “qëllimisht”.

Në reagimin e tij, kryeministri Keir Starmer e cilësoi ngjarjen si shumë shqetësuese dhe deklaroi në Parlament se kishte nisur një hetim. Incidenti vjen në një kohë kur në kryeqytetin britanik janë shtuar ndjeshëm sulmet me zjarrvënie ndaj sinagogave dhe objekteve të tjera të komunitetit hebre.