Policia daneze: Adoleshentët suedezë rekrutohen nga grupet kriminale për Danimarkën

Një zyrtar i lartë i policisë daneze zbuloi se autoritetet e zbatimit të ligjit kanë hasur në raste të adoleshentëve suedezë që kryejnë krime të rënda brenda Danimarkës në këmbim të pagesave të majme. 

Dy adoleshentë suedezë të moshës 17 dhe 16 vjeç janë vënë në paraburgim në Danimarkë pasi u arrestuan për të shtënat në Kolding dhe Kopenhagë të mërkurën.

Policia daneze pohoi se dy adoleshentët u rekrutuan nga kriminelët në rrjetet sociale për të ekzekutuar të shtënat.

Hetuesi i policisë Torben Svarrer tha se kjo lidhje mes adoleshentëve suedezë dhe kriminelëve danezë u zbulua pas dy incidenteve të të shtënave këtë javë.

“Ne kemi parë që kriminelët po kërkojnë njerëz të gatshëm për të kryer krime të rënda në mediat sociale dhe se të rinjtë suedezë për fat të keq po pranojnë ta bëjnë këtë për pagesë. Ata thjesht po marrin një shumë të madhe parash për të kryer krime të dhunshme, duke përfshirë vrasjen.” -u shpreh oficeri i policisë.

Në qershor, dy adoleshentë suedezë u arrestuan nga policia e Kopenhagës për përfshirjen e tyre të dyshuar në dhunën e bandave në Brondby.