Policia e Shtetit dorëzon të gjitha qendrat e votimit, nuk raportohet asnjë problem

Policia e Shtetit thotë se pas marrjes në ruajte të të gjitha qendrave të votimit në të gjithë territorin e vendit, ka bërë dorëzimin e tyre një orë para hapjes së votimit pa konstatuar asnjë problematikë.

“Të gjitha objektet zgjedhore që do të shërbejnë si Qendra Votimi, të cilat ishin marrë në ruajtje nga shërbimet e Policisë janë dorëzuar në rregull dhe pa probleme mëngjesin e sotëm, nga ana e punonjësve të Policisë, dhe janë marrë në dorëzim nga komisonet përkatëse”, bëhet e ditur nga  policia.

Sipas policisë marrja në ruajtje e Qendrave të Votimit ditën e djeshme dhe dorëzimi i tyre mëngjesin e sotëm është raportuar në kohë reale nga punonjësit e Policisë, te grupet e drejtimit në DVP dhe në Drejtorinë e Përgjithshme të Policisë së Shtetit, nëpërmjet një aplikacioni të posaçëm.

Ndërkohë punonjësit e Policisë, pas dorëzimit të qendrave të votimit janë grumbulluar në ambientet e përcaktuara për punonjësit e Policisë gjatë procesit zgjedhor, të gatshëm për të ndërhyrë në rast se nga ana e komisioneve të votimit kërkohet ndihma e Policisë.