Policia u gjen armë në makinë, arrestohen shoferi dhe dy pasagjerë në Luz të Krujës

Policia e Tiranës ka arrestuar tre persona në kuadër të operacionit “Flagranca 3”, pas ndalimit të një automjeti në fshatin Luz të Krujës, brenda të cilit u gjet një armë zjarri.

Sipas njoftimit zyrtar, është arrestuar në flagrancë 38-vjeçari Egeralt Mziu, si posedues i një pistolete pa leje.

Ndërsa dy pasagjerët që ndodheshin në makinë, Enis Dema, 34 vjeç, dhe Ilir Dobrozi, 39 vjeç, u arrestuan për moskallëzim për armën.

Gjatë kontrollit, policia sekuestroi armën e zjarrit së bashku me municion luftarak.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.