Politika ‘kërkon’ KQZ, intervistohen 25 kandidatë, shumica prej tyre me mbështetje politike

Janë intervistuar 25 kandidatë të cilët aspirojnë të bëhen pjesë e Komisionit Qendror të Zgjedhjeve. Seancat u shoqëruan me batuta dhe humor ku shumica e kandidatëve vinin nga jeta politike.

Komisioni i Posaçëm Parlamentar vijoi me seancat dëgjimore me kandidatët që kërkojnë të jenë pjesë drejtuese e Komisionit Qendror të Zgjedhjeve.

25 kandidatë kaluan në filtrin e deputetëve të Kuvendit por edhe të përfaqësuesit të Partisë Demokratike, Oerd Bylykbashi.

Kandidatët të cilët duhet të mbrojnë interesin e qytetarëve për votën e lirë, shpesh herë dolën në pozita jo fort të favorshme për vetë ata.

I tillë ishte rasti i kandidatit Arens Çela, këshilltar i grupit parlamentar të Partisë Socialiste ku batutat për kandidimin e tij nuk munguan as nga vetë Damian Gjiknuri.

“Çfarë të ka shtyrë për të kandiduar jo kush të ka shtyrë”,-tha ai.

Intervista më pikante mund të konsiderohet ajo me Bledar Skënderin e kjo për vetë faktin se ai nuk kishte dhënë dorëheqjen nga mandati i anëtarit të KQZ-së, pavarësisht se ligji i ndalon këta të fundit që të kandidojnë, gjë që ai e kishte të qartë.

“Faktikisht edhe unë e kam lexuar ligjin dhe aty thuhet ish ish ish, por ndërkohë unë kam qenë funksionar, jam aktualisht në detyrë anëtar i KQZ. Hapa edhe fjalorin e gjuhës së sotme shqipe, ‘ish’ është një fjalë pasthirrmë që përdoret për të trembur pulat. Nuk e di nëse ‘ish’ është përdorur në këtë lloj konteksti në ligjin zgjedhor jam dakord”,- tha Bledar Skënderi

Një ndër kushtet që të bëhesh anëtar i një nga tri hallkave të KQZ-së është që të mos jenë anëtar të subjekteve politike, ku nga 25 kandidat, 24 e refuzuan ndonëse më parë kanë mbajtur poste ekzekutive që lidheshin me partitë në pushtet, përjashtuar njërit, Haki Mustafa, ish drejtori i OSHEE-së gjatë qeverisë teknike të vitit 2017. Sinqeriteti i tij bëri për vete edhe vetë Myslym Murrizin.

Gjiknuri: Jeni anëtar partie ju Haki?

Haki Mustafa: Unë patjetër. Edhe ajo thotë të jesh funksionar politik dhe unë të gjitha funksionet i kam politike.

Murrizi: Je i sinqertë që thua jam anëtar partie. Ata që thonë që s’jemi janë më shumë se ata që thonë jemi.

Jo të gjithë kandidatët shfaqën interesin e deputetëve, por kishte edhe përjashtime. E tillë ishte edhe intervista me Helga Vukajn, ish-minsitren teknike të financave ku për habi, vlerësimin maksimal e mori nga socialistët e jo demokratët.

Hyseni: Jemi të nderuar për një kandidaturë të tillë. Mendoj që nëse do të gjenin akordet është një kandidaturë mëse e kompletuar. Kjo është edhe një thirrje për kolegun e opozitës.

Murrizi: Po qe dakord partia juaj Alket, fol me Ramën se ne dakord jemi se nga partia jonë vjen.

Ndërkaq, mbështetjen e shfaqur me fjalë, Damian Gjiknuri e tregoi me një eksperiencë personale.

“Unë do të jap një eksperiencë nga jeta ime. Isha në një pozicion në organet e drejtësisë dhe thanë të gjithë po. Dhe kur u hodh vota e fshehtë, si përfundim unë asnjë votë nuk mora”,- u shpreh përfaqësuesi i mazhorancës në Këshillin Politik.