Polonia shprehet e gatshme të mirëpres vendosjen e armëve bërthamore të NATO-s

Polonia është shprehur e gatshme të mirëpresë vendosjen e armëve bërthamore të NATO-s në territorin e saj përballë Rusisë.

Deklaratat u bënë këtë të hënë nga presidenti i vendit Andrzej Duda, i cili u shpreh i gatshëm për forcimin e krahut lindor të aleancës me armë nukleare.

“Nëse aleatët tanë vendosin të sjellin armë bërthamore në territorin tonë, për të përforcuar krahun lindor të NATO-s, ne jemi gati ta bëjmë këtë”, tha Duda.

Deklarata vjen teksa Moska po përforcon armatimet e saj në Bjellorusi dhe Kaliningrad.

Polonia, një anëtare e NATO-s dhe një mbështetëse e vendosur e Ukrainës, ndan një kufi si me enklavën e Kaliningradit të Rusisë, ashtu edhe me Bjellorusinë, aleatin e Moskës.

Kaliningrad u shkëput nga Moska kur Lituania u bë e pavarur gjatë shpërbërjes së Bashkimit Sovjetik në 1991.

Duda foli për mediat polake pas një vizite në Nju Jork, ku zhvilloi takime në OKB dhe diskutoi për luftën në Ukrainë me ish-presidentin amerikan Donald Trump. Në mars, ai vizitoi Uashington DC, ku u takua me Presidentin e SHBA Joe Biden.

Diskutimet rreth bashkëpunimit bërthamor midis Polonisë dhe SHBA-së kanë vazhduar “për disa kohë”, tha ai.

“Unë kam folur tashmë për këtë disa herë. Më duhet të pranoj që kur u pyeta për këtë, shpreha gatishmërinë tonë”, tha Duda.

“Rusia po militarizon gjithnjë e më shumë Kaliningradin. Kohët e fundit ajo ka zhvendosur armët e saj bërthamore në Bjellorusi,” shtoi ai.

LEXONI GJITHASHTU:

• Zelensky i lutet Perëndimit për kundërajrorë, Rusia vijon sulmet ajrore
• Zelensky kundër planit të Trump: S’i japim toka Rusisë