Prej 10 muajsh në çadër dhe pa përgjigje, PD denoncon rastin e familjes në Kurbin

Partia Demokratike denoncoi të martën rastin e familjes Uka në fshatin Shpërdhet të Kurbinit, e cila prej tetë muajsh është shpërngulur dhe jeton në çadër pasi tërmeti i 26 nëntorit 2019 i shembi shtëpinë. Familja ankohet se nuk ka gjetur ende zgjidhje për strehimin ndërkohë që autoritetet i kanë ndryshuar vlerësimin e dëmeve duke dalë në përfundimin se banesa mund të meremetohet.

“Jetoj prej 8 muajsh në çadër. Shtëpia sikur e shikoni është e prishur totalisht, e shkatërruar. Banesa ka dalë DS4 dhe kemi shkuar të pyesim në bashkinë e Laçit dhe është, ka thënë se është për shkatërrim total, se është prishur nga themeli. Tani thonë do riparohet. Si do riparohet ajo shtëpi? Nuk e di tani. Kushtet janë shumë të rënda, shumë të vështira. Të jetosh mes pisllëkut, nuk e di është katastrofë,” – u shpreh Shkëlzen Uka.

Uka i tha kryetarit të Forumit Rinor të PD-së, Belind Këlliçi se askush nuk i ka dhënë përgjigje.

“Të shkosh në bashki s’të pyet kush, akoma s’ka ardhur thonë informacioni për shtëpi e asgjë. Ne u bëmë gati një vit në çadër, po rrimë me minjtë e me macet e me qentë e s’pyet kush,” – shton më tej Shkëlzeni teksa ankohet edhe për faktin se tashmë familja rrezikohet edhe nga pandemia e koronavirusit.

Prej muajit gusht opozita denoncon raste të ndryshme familjesh të mbetura pa zgjidhje nga situata që la pas tërmeti i 26 nëntorit, i cili u mori jetën 51 personave.

Rastet e sjella nga PD-ja kanë qenë nga Thumana, Durrësi, Shijaku, Kurbini, Mamurrasi, Bubqi, Lezha dhe Tirana.

Në një intervistë për Euronews Albania, ministri për Rindërtimin, Arben Ahmetaj i hodhi poshtë pretendimet. Ai këmbënguli se nuk ka pasur vonesa, dhe se problemet kryesore kanë ardhur për shkak të pandemisë.

Megjithatë ai garantoi se brenda vitit 2020 një pjesë e madhe e familjeve të cilave iu dëmtuan shtëpitë do të kenë mundësinë të hynë në banesat e reja.

Ndërkohë sot qeveria nënshkroi me BE-në programin prej 40 milionë eurove të rindërtimit të siteve kulturore.

Lexoni gjithashtu:

Tërmeti u prishi shtëpinë, PD sjell rastin e familjes në Mamurras: Ky, dimri i dytë në çadër

Grantet e rindërtimit, PD denoncon rastin e familjes në Shijak: Kemi bërë vetëm letra, s’kemi marrë asgjë

PD denoncon rastin e qytetares nga Lezha, prej 10 muajsh me burrin e paralizuar dhe tre fëmijët në çadër

Bilanci i rindërtimit, Ahmetaj në Euronews Albania: Nuk ka vonesa, brenda vitit shumë banorë do futen në banesa të reja