Prej vitit 2013, prishja e ndërtimeve pa leje, një nga angazhimet e mëdha të qeverisë Rama

Lirimi i hapësirave publike nga ndërtimet pa leje ishte nga angazhimet e mëdha të qeverisë Rama pas ardhjes në pushtet në vitin 2013.

Gjatë një inspektimi në Durrës në vitin 2014, krah kryebashkiakut Vangjush Dako, kryeministri Rama njoftoi një aksion për lirimin e plazheve.

“Paralelisht duhet të fillojmë gjithë prishjet dhe pastrimet e gjithë çfarë ka pa leje, plus gjithë këto tabela, historira të sistemohen,” – u shpreh Rama asokohe.

I konsideroi “çibanë” ndërtimet pa leje dhe në dhjetor të 2014-s, rriti me ligj burgun për ata që ndërtojnë në këtë mënyrë.

“Për t’i dhënë fund një historie që vazhdon jo prej një dite, por prej 25 vjetësh,” – tha kryeministri Rama gjatë fjalës së tij në parlament për ligjin e ri.

Me shumë bujë, në qershor të vitit 2020, ministri i Brendshëm, Sandër Lleshaj e drejtoi vetë aksionin në Velipojë e Lezhë, madje u konfliktua dhe me kryebashkiakun e Lezhës, Pjerin Ndreun, i cili e konsideronte të papërshtatshme kohën e ndërhyrjeve.

Pamjet e përplasjeve mes pronarëve të cilëve u prisheshin ndërtimet në bregdet me IKMT-në dhe Policinë e Shtetit, u bënë normale.

Në 2021-shin ky aksion quhet “Bregdeti ynë”.

LEXONI GJITHASHTU:

• Ekspertja e cilëson antireklamë për turizmin aksionin e qeverisë për të liruar plazhet në mes të sezonit
• Aksion policor në bregdetet e vendit për lirimin e hapësirave të zaptuara në mënyrë të paligjshme
• “Mos i ndodhtë askujt”, babai i vëllezërve të vrarë në Velipojë tregon se sherri nisi për shezlongët