Në Anfield ëndërrojnë titullin kampion dhe është një person ai i cili i bën të gjithë të besojnë tek magjia, Arne Slot. Tekniku që në vitin e tij të parë në Angli po dhuron spektakël me Liverpoolin e tij, që duket si një armë vrastare për kundërshtarët në ishull. Në fundjavë, të kuqtë morën një tjetër fitore me përmbysje ndaj Southampton, duke e parë veten në vendin e parë, 8 pikë para Manchester Cityt.
Kur na ndajnë vetëm pak ditë nga përballja e parë direkte në Ligë mes tyre, qytetarët janë në krizë rezultatesh, ndërsa Liverpooli është i qetë, me luksin edhe të një hapi fals. Të dielën, mposhtën Southamptonin në transfertë 2-3, ndërsa heroi ishte Salah me një dopietë, e përpara tij Szoboszlai. Vendësit shënuan me Armstrong dhe Fernandes, ndërsa shpërdoruan dhe një 11-metërsh.
Ndeshja debutuese e Ruben Amorim në krye të djajve të kuq nuk shkoi në mënyrën më të mirë të mundshme, por përfundoi në një barazim 1-1. Edhe pse shënoi që në start, në transfertën e Ipswich, Manchester United hodhi një hap fals, pasi kundërshtari barazoi me Hutchinson. Gjithçka u zgjidh në fraksionin e parë, ndërsa në të dytin shifrat mbetën të pandryshuara.
