Presidenca e Begajt, analistët: Fjalime zhgënjyese, por i duhet lënë kohë

Bajram Begaj nisi zyrtarisht të dielën detyrën si president. Analistët shprehen të zhgënjyer nga çështjet që kreu i ri i shtetit nuk preku në fjalimet e tij të para.

Por a do të jetë ai një noter i mazhorancës? Lutfi Dervishi dhe Enton Abilekaj, kanë mendime te ndryshme.

“Ai nuk foli as për diasporën, as për Kosovën, nuk foli për çështje shumë të mprehta që ka Shqipëria, për shpopullimin,” – tha Abilekaj.

“Përfshirja e tij në një proces të kapjes së presidencës nga Edi Rama duke e shitur këtë si një proces për gjetjen e një presidenti të pavarur ishte minusi i tij më i madh,” – shtoi ai.

“Në fjalimin e parë, sidomos në parlament binin në sy mungesat e shumta të mesazheve që duhet t’i kishte përcjellë presidenti. Një president flet për njerëzit, për komunitetet, për vendin, për Kosovën, për fqinjët, për rrugëtimin që kemi drejt BE-së, të gjitha këto munguan,” – tha Dervishi.

“Është një kohë që ai duhet të konsumojë mirënjohjen ndaj mazhorancës që e ka zgjedhur, por s’mund të jetë e pafundme. I duhet dhënë kohë që të kalojë nga profili i ushtarakut, në profilin e kryetarit të shtetit,” – shtoi ai.

Bajram Begaj është presidenti i tetë i republikës, i treti me një karrierë ushtarake para marrjes së detyrës dhe i dyti si mjek.

LEXONI GJITHASHTU:

• Betohet presidenti i ri Bajram Begaj, 5 ngjarjet kryesore të ditës