Presidenti i Këshillit Evropian: Rusia duhet të ndalojë dhunën në Ukrainë

Rusia duhet të ndalojë dhunën në Ukrainë, thotë Presidenti i Këshillit Evropian, António Costa, duke shtuar se presioni i fortë përmes sanksioneve duhet të vazhdojë nëse Kremlini nuk e ndal konfliktin.

“Pas tre vitesh e gjysmë lufte, aktiviteti diplomatik po përshpejtohet dhe ka një vrull në rritje për t’i ofruar Ukrainës garanci sigurie, përfshirë marrëveshjen e Presidentit të Shteteve të Bashkuara Trump për të marrë pjesë në këtë përpjekje. Ne e mirëpresim këtë”, tha Costa të martën në një konferencë shtypi në Lisbonë të Portugalisë, pas një videokonference me udhëheqësit e BE-së.

“Tani është koha për të përshpejtuar punën tonë praktike, për të vendosur një garanci të ngjashme me Nenin Pesë të NATO-s, me angazhim të vazhdueshëm të Shteteve të Bashkuara”, tha Costa.

“Koalicioni i të Vullnetshmëve duhet të mbetet i përfshirë ngushtë në këtë proces”, shtoi ai, duke argumentuar se udhëheqësit evropianë duhet të përfshihen sepse “siguria e Ukrainës dhe e Evropës është ajo që është në rrezik këtu”.