Presidenti Meta dekreton Edi Ramën si kryeministër të Shqipërisë

Presidenti Ilir Meta ka dekretuar emërimin e Edi Ramës si kryeministër i Shqipërisë.

Në dokumentin e publikuar në faqen zyrtare të Presidencës thuhet se dekretimi i Ramës bëhet në bazë të kushtetutës, pasi Partia Socialiste, pas certifikimit të rezultatit të zgjedhjeve të 25 prillit nga KQZ, rezulton se ka shumicën e vendeve në Kuvend.

Disa ditë më parë socialistët propozuan zyrtarisht përmes një kërkese drejtuar presidentit, Edi Ramën si kryeministër.

Brenda 10 ditëve kryeministri i mandatuar i paraqet Kuvendit programin qeverisës dhe emrat e kabinetit të ri. Pas miratimit nga parlamenti qeveria e re shkon për dekretim tek presidenti i republikës, të cilin pak kohë më parë mazhoranca socialiste e shkarkoi nga detyra përmes një votimi në Kuvend.

Tensionet mes dy liderëve Meta-Rama u shtuan shumë para zgjedhjeve të 25 prillit, ku kreu i shtetit u përfshi shpesh në fushatë duke dalë hapur kundër qeverisë dhe kryeministrit. Por tonet duket se u zbutën nga presidenti pas zbardhjes së rezultatit të zgjedhjeve, ku fituese rezultoi PS.

Kjo nuk e pengoi PS të ngrinte një komision hetimor për kreun e shtetit dhe në limite të afateve kohore të votonte në Kuvend shkarkimin e tij nga detyra. Vendimi është tani në dorë të Gjykatës Kushtetuese.

LEXONI GJITHASHTU:

• Meta për Euronews Albania: Kam informacione se po tentohet që të manipulohen zgjedhjet e 25 prillit
• Historiku i përplasjeve Rama-Meta, presidenti ktheu mbi 60 ligje, maxhoranca kërkon për herë të dytë shkarkimin e tij