Presidentja Osmani do t’i dërgojë Kushtetueses komentet për bllokimin e Kuvendit

Presidentja e Kosovës, Vjosa Osmani, do t’i dorëzojë të martën Gjykatës Kushtetuese komentet e saj lidhur me çështjen e konstituimit të Kuvendit, konfirmoi këshilltari i saj për media, Bekim Kupina.

Ky veprim i Presidentes vjen pas vendimit të Gjykatës Kushtetuese, e cila javën e kaluar vendosi masë të përkohshme që ndalon deputetët e sapozgjedhur të ndërmarrin veprime institucionale dhe pengon zhvillimin e çdo procedure për formimin e një qeverie të re. Kjo masë, e vendosur ex officio mbi bazën e një kërkese të Listës Serbe, do të qëndrojë në fuqi nga 5 deri më 30 shtator 2025.

Kupina nuk dha detaje mbi përmbajtjen e komenteve që do të dorëzojë presidentja, por theksoi qëndrimin e saj të vazhdueshëm:

“Askush nuk duhet të ketë të drejtën të bllokojë institucionet, e rrjedhimisht shtetin. Ashtu siç parashihet në nenin 57(4) të Kushtetutës, realizimi i të drejtave të komuniteteve është i pandashëm nga detyrimi për të respektuar ligjet e Republikës së Kosovës dhe për të mos i cenuar të drejtat e të tjerëve.”

Vendimi i Kushtetueses ka shkaktuar debat të gjerë në opinionin publik dhe në skenën politike, pasi konsiderohet si një precedent i pazakontë që pezullon funksionimin normal të institucioneve pas zgjedhjeve. Në pritje të opinionit të Presidentes dhe vendimit përfundimtar të Gjykatës, situata politike në Kosovë mbetet e tensionuar.