Probleme nga moti i keq në Qukës-Qafë Plloçë, devijohet qarkullimi i automjeteve

Moti i keq dhe reshjet kanë shembur një segment rrugor në aksin Qukës-Qafë Plloçë. Një  masiv dheu dhe gurë janë shkëputur nga skarpatat e rrugës duke sjellë bllokimin e saj. Kjo ka ardhur si pasojë e reshjeve të shumta të ditëve të fundit.

Për shkak të rrezikut dhe për të garantuar sigurinë e përdoruesve të rrugës, qarkullimi i automjeteve është devijuar në një korsi të re, e cila ishte hapur disa ditë më parë, pasi pritej që një situatë e tillë të ndodhte.

Nga ana e kompanisë ndërtuese është realizuar një bypass, i cili mundëson kalimin e mjeteve në të dy drejtimet, duke shmangur bllokimin total të qarkullimit në këtë segment problematik.

Në një njoftim për mediat, Autoriteti Rrugor shqiptar bën me dije se “reshjet e dendura të shiut që kanë përfshirë vendin, kanë shkaktuar çarjen e skarpatës dhe rënien e gurëve në trup të rrugës në km 35 të aksit Qukës-Qafë Plloçë. Grupet e punës të ndodhura në terren, po bëjnë vlerësimin e situatës dhe kanë marrë të gjitha masat për krijimin e një bypass-i të përkohshëm me qëllim devijimin e trafikut në këtë segment, duke shmangur rrezikun ndaj përdoruesve të rrugës”.

ARRSH njofton se gjithë aksi është i hapur, i aksesueshëm pa probleme dhe në monitorim të vazhdueshëm. Gjithashtu, Autoriteti Rrugor Shqiptar iu bën thirrje të gjithë drejtuesve të mjeteve udhëtojnë me kujdes, të mbajnë distancën e sigurisë dhe të shmangin frenimet e papritura.

LEXONI GJITHASHTU:

• Aksident në Dibër, përplasen dy makina në Trepçë! Plagosen 5 persona
• Badge të KQZ të falsifikuara në zgjedhje, Prokuroria Tiranë dërgon në gjyq 3 persona