Prodhim i mbarë i rrushit në Peqin, por bien shitjet në krahasim me vitin e kaluar

Prodhimi i rrushit në Peqin këtë vit është i mbarë, por këtë vit mungojnë konsumatorët. Ky është konstatimi që vjen nga një prej fermerëve të zonës, i cili merret me vreshtari prej 25 vitesh.

“Ne kemi që prej 25 vitesh që merremi me vreshtin. Babai im ka punuar në Greqi me këtë lloj vreshti dhe i sollëm rrënjët këtu. Me familjen e kemi shtuar vit pas viti. Këtë vit është pak problem me pjesën e shitjes, jo shumë sepse kam vite që njihem me këtë lloj vreshti dhe klientët i kam, por ka ndryshime”, tha Ideal Gjeli, fermer.

Çmimi i rrushit nuk është i lartë për konsumatorin, por zhvendosja e banorëve dhe fuqia blerëse ka ndikuar në uljen e shitjeve.

“Çmimi nuk është i lartë për qytetarin, por konsumatorët nuk janë më. Shumë njerëz janë në emigrim, nuk e kanë atë fuqi blerëse. Nëpër shtëpi pothuajse kanë mbetur vetëm persona të moshës së tretë, rinia nuk është më këtu”, shtoi fermeri.

Në vreshtin e familjes Gjeli kultivohen pesë varietete të ndryshme, që përdoren si për konsum në tryezë, ashtu edhe për prodhimin e rakisë dhe verës. Kujdesi për to, sipas familjes, është punë e pandërprerë gjatë gjithë vitit.

“Po bëjmë gati 1 hektar që është vresht dhe kemi pesë lloje: Vitoria, Italia, Red Globe, Sangiovese dhe Trebbiano. Kemi të gjitha: rrush tavoline për të ngrënë, rrush për raki dhe verë. Është shumë e vështirë – një vit i plotë merresh vetëm me vreshtin. Mbaron vjelja në shtator–tetor, pastaj fillon krasitja dhe përgatitja për vitin tjetër. Ka shumë sakrifica”, tha ai.

Për këtë familje, vreshti mbetet jo vetëm një burim të ardhurash, por edhe një traditë që ata duan ta trashëgojnë. Megjithatë, sfidat e tregut, importi dhe emigracioni vazhdojnë të rëndojnë mbi prodhuesit e vegjël vendas.

LEXONI GJITHASHTU:

• Protestë në Hagë në mbështetje të ish-krerëve të UÇK
• Plagosi me armë 28-vjeçarin, Policia identifikon dhe shpall në kërkim 44-vjeçarin