Projekti për Shtëpinë e fëmijëve dhe Kompleksin e Inspektorateve, Rama: I hapim rrugë nismave të reja

Kryeministri Edi Rama në fjalën e mbajtur në konkursin ndërkombëtar për prezantimin e projekt-ideve për Shtëpinë e re të fëmijëve dhe Kompleksin e Inspektorateve Shtetërore, theksoi rëndësinë procesit të partneritet publik-privat në realizimin e hapësirave të reja për funksione publike.

Rama tha se Shqipëria po zhvillon një sërë projektesh të rëndësishme infrastrukturore dhe arkitekturore, mes të cilave stadiumi i ri me standarde europiane, Biblioteka e re Kombëtare, kompleksi i ri të zyrave për administratën, Pallati i ri i Sportit.

“Falë këtij procesi do të kemi më në fund pas vitesh një stadium të ri të përmasave europiane, një tjetër vepër arkitektonike të denjë për historinë e re që po shkruajmë së bashku me këtë skuadër të jashtëzakonshme arkitektësh, Bibliotekën e re Kombëtare, një mjedis i shumë nevojshëm prej vitesh dhe një tjetër vepër e spikatur në historinë, jo thjesht të vendit tonë, por në historinë e arkitekturës bashkëkohore. Do të kemi po ashtu një kompleks të ri zyrash për administratën, për një numër të konsiderueshëm institucionesh, do të kemi pallatin e ri të sportit, një vepër mbresëlënëse që në projekt mori mbështetjen konsensuale të jurisë ndërkombëtare dhe një sërë veprash të tjera me interes të madh publik.

Sot me këtë projekt, ne i hapim rrugë dy drejtimeve të reja për të ardhmen, duke krijuar kushte tërësisht të reja për fëmijët që janë në duart e solidaritetit të shoqërisë, jetimët dhe njëkohësisht edhe për korpusin e ri të inspektorateve dhe me këtë rast dua të falënderoj këtu kryeinspektorin që për 10 vite rresht drejtoi një institucion që lindi vërtetë nga hiçi dhe u krijua nga e para dhe që sot është gati të bëjë një hop tjetër”, tha Rama mes të tjerash.