Protesta anti-qeveritare në Gjeorgji, nuk pranohet rezultati i zgjedhjeve

Disa mijëra persona mbajtën një protestë përpara Parlamentit të Gjeorgjisë në Tbilisi, në prag të sesionit të parë të legjislaturës së re.

Protestuesit u zotuan se do ta kalonin natën jashtë godinës, duke akuzuar partinë në pushtet Ëndrra Gjeorgjiane për manipulim të zgjedhjeve të tetorit.

Anëtarë të opozitës njoftuan gjithashtu refuzimin e tyre për të marrë pjesë në aktivitetet parlamentare.

“Protesta do të zgjasë gjatë natës dhe nesër ata duhet të dëgjojnë zërin tonë se këto zgjedhje ishin të manipuluara dhe nuk kanë legjitimitetin e popullit gjeorgjian dhe as atë të komunitetit ndërkombëtar”, tha Khatia Dekanoidze, kryetare e Lëvizjes për Unitet Kombëtar.

Protestat erdhën pas zgjedhjeve të 26 tetorit që mbajtën në pushtet partinë pro-ruse Ëndrra Gjeorgjiane. Kundërshtarët e saj pretendojnë se procesi ishte i manipuluar dhe akuzojnë Rusinë fqinje për ndërhyrje.

Komisioni Qendror i Zgjedhjeve deklaroi se partia në pushtet kishte fituar 54% të votave dhe krerët e saj kanë hedhur poshtë akuzat për shkelje.

Vëzhguesit evropianë deklaruan nga ana tjetër se zgjedhjet u mbajtën në një atmosferë përçarëse të karakterizuar nga korrupsioni, votimi i dyfishtë dhe dhuna fizike.

Presidentja pro-evropiane e vendit tha më herët gjatë muajit se do t’i apelonte zgjedhjet në Gjykatën Kushtetuese të vendit.

Qershorin e kaluar, BE pezulloi pa afat aplikimin e Gjeorgjisë për anëtarësim, pasi Parlamenti i vendit miratoi ligjin e stilit rus kundër ndërhyrjeve të huaja.

Ëndrra Gjeorgjiane ka çuar përpara edhe ligje të tjera të ngjashme me ato të Kremlinit për të penguar fjalën e lirë dhe të drejtat e komunitetit LGBT+.

LEXONI GJITHASHTU:

• Lideri separatist gjeorgjian thotë se ende s’ka kompromis me protestuesit në Abkazi
• Shpallen rezultatet e zgjedhjeve në Gjeorgji, kreu i komisionit spërkatet me bojë