Protesta në Sllovaki, qytetarët kundër shkarkimeve politike, akuzojnë qeverinë

Disa mijëra persona u mblodhën në Bratislavë për të protestuar kundër shkarkimeve të bëra nga qeveria ndaj drejtuesve të institucioneve kulturore.

Rreth 9 mijë persona demonstruan përpara Teatrit Kombëtar Sllovak dhe selisë së Ministrisë së Kulturës në qendër të kryeqytetit.

Protestat erdhën pas valës së shkarkimeve që përfshiu drejtorin e teatrit dhe atë të Galerisë Kombëtare, lëvizje të cilat qytetarët i konsiderojnë të motivuara politikisht.

Duke sqaruar shkarkimin e drejtorit të teatrit, ministrja e Kulturës deklaroi se ai ishte përfshirë në aktivitete politike, pasi kishte kritikuar vazhdimisht dikasterin e saj. Gjithashtu, ajo e mbajti atë përgjegjës për rrëzimin e një abazhuri gjatë një shfaqjeje.

Ndërsa lidhur me shkarkimin e drejtoreshës së Galerisë Kombëtare, ministrja tha se ajo kishte qenë përgjegjëse për një seri dështimesh në aspektin menaxherial.

Nga ana e saj, drejtoresha e shkarkuar tha se akuzat e ministres ishin të fabrikuara dhe se konflikti mes tyre datonte që prej vitit 2010.

LEXONI GJITHASHTU:

• Sllovakia ofron zgjidhje për të rivendosur rrjedhat e naftës ruse përmes Ukrainës
• Turistja sllovake humb jetën në plazhin e Golemit, ja çfarë dyshohet