Protestat e dhunshme “shpërthejnë” në territorin francez të Paqësorit

Protestat e dhunshme kanë shpërthyer për reformat e propozuara të votimit në territorin francez të Paqësorit, Kaledonia e Re. Autoritetet thanë se makinat janë djegur, dyqanet janë plaçkitur dhe ka pasur të shtëna me armë ndaj policisë.

Një shtetrrethim është vendosur në kryeqytetin Noumea dhe aeroporti ndërkombëtar është mbyllur, ndërsa janë thirrur forcat e policisë.

Kryeministri francez Gabriel Attal ka bërë thirrje për “qetësi”, duke thënë se “dhuna nuk është dhe nuk mund të justifikohet kurrë”.

Protestat paqësore mbi reformat e votimit u shndërruan në të dhunshme të hënën mbrëma, përpara një votimi në Asamblenë Kombëtare Franceze të martën.

Projektligji do të ndryshojë rregullat e votimit të Kaledonisë së Re për të lejuar banorët francezë që kanë jetuar në territor për 10 vjet të votojnë në zgjedhjet provinciale – një lëvizje që drejtuesit lokalë kanë frikë se do të zbehë votën e popullsisë vendase të Kanakëve.

Rebelët thuhet se kanë pushtuar disa rrethrrotullime, kanë sulmuar stacionet e policisë dhe janë përballur me policinë, e cila është përgjigjur me predha jo vdekjeprurëse.

Të shtëna ndaj policisë u qëlluan duke përdorur armë të kalibrit të lartë dhe pushkë gjuetie, por asnjë nuk u vra, tha Komisioneri i Lartë Louis Le Franc, sipas AFP.

Gjatë dy ditëve të fundit 82 persona janë arrestuar, tha ministri i Brendshëm i Francës Gerald Darmanin, ndërsa 54 policë u plagosën. Ai dënoi ashpër dhunën, duke shtuar se po dërgoheshin përforcime policore.

LEXONI GJITHASHTU:

• Protestuesit izraelitë bllokojnë kamionët me ndihma të destinuara për në Gaza
• SHBA i kërkon Iranit të mos furnizojë me armë rebelët Huthi