Protestë masive në Londër në mbështetje të Palestinës, disa të arrestuar

Policia ka nisur arrestime gjatë një proteste masive në Londër, ku qindra qytetarë u mblodhën për të kundërshtuar ndalimin e grupit aktivist Palestine Action.

Demonstrata u zhvillua në Trafalgar Square, ku pjesëmarrësit mbanin pankarta me mesazhe si “Unë kundërshtoj gjenocidin. Unë mbështes Veprimin për Palestinën”. Disa persona u shoqëruan nga policia, përfshirë edhe të moshuar me bastunë.

Sipas dëshmive të publikuara nga Al Jazeera, disa protestues thanë se po merrnin pjesë në mbështetje të demokracisë dhe lirisë së shprehjes, ndërsa kritikuan veprimet e autoriteteve si të rrezikshme për këto të drejta.

Organizata Defend Our Juries, e cila organizoi protestën, kërkoi heqjen e ndalimit ndaj Palestine Action dhe të gjitha akuzave ndaj personave të arrestuar sipas ligjit të terrorizmit, duke pretenduar se ata po ndëshkohen për mbështetje ndaj aktivistëve.

Palestine Action e përshkruan veten si një grup veprimi të drejtpërdrejtë që synon t’i japë fund, siç thotë ai, bashkëpunimit britanik në keqtrajtimin e palestinezëve nga Izraeli.